2007-2008 udalgintzako balantzea
Udalaren funtzionamenduari buelta emango geniola hitza eman genuen eta gure partetik ahalegin guztiak egiten ari gara hori betetzeko. Batez ere, herritarren iritzia kontuan hartzea da gure helburu garrantzitsuena eta hori lortze aldera pauso batzuk eman ditugu.
Hauteskundeetan lortutako zinegotzi kopuruak gure hainbat eta hainbat proposamen aurrera ateratzea ahalbidetzen du. Ez gara oposizio hutsa. Batzuetan denon adostasunarekin lortzen dugu, beste batuetan EB-Aralarren aldeko botoarekin.
Alde negatiboa: ez dugu lortzen testuinguru politikoari dagozkion gaietan udaleko beste indarren iritziak gure ingurura biltzea. Egoera ez da erreza eta Garzonen autoa heldu denetik partidu politiko bezala dagokiguna ezin dugu kobratu. Ekainaren 16an hasi da Espainiako Audientzia Nazionalean gure ilegalizazioaren inguruko epaiketa. Uztailaren amaierarako sententzia espero da.
Alkateak errepikatu badu alkatetzan ez da gure adostasunagaz izan. Aurreko legealdian ezker abertzaleko ordezkariak aintzat hartu ez eta informazioa ere ukatu egin zitzaigun. Egun batetik bestera ez da udalean lan egiteko era aldatzen eta udaleko dinamikan hori sumatu egiten da. Hainbat gaietan alkatea dinamizatzaile ordez,oztopo, enbarazu bihurtzen ari da. EAJ-k bultzatzen ez dituen proiektuetan erritmoa apropos moteltzen da. Eta normala da, guk, EB-ARALARegaz batera, ezkerreko politika egitea eskatzen diogu PNVkoa den alkate bati, hau da, eskuindarra den alkate bati. Beharrezkoa da alkatetza gure eskuetan egotea, ahalegin berdina eginda aurrerapauso nabarmenagoak emango liratekeelako. Dena den urtebete honetan aldaketa ematea lortu dugu hainbat gaitan
Hemendik aurrerako proiektuak:
- Larrabetzuko Plan Orokor berria egitea, ahalik eta hiritarren parte hartze handienaz burutzea.
- Alde historikoaren PERIa
- Herritarren parte hartzea bultzatzea udaleko gaietan:
- Osoko Bilkura herritarren iritzia jasotzeko tratatzen diren gaietan.
- Kultura kontseilua eratzea, herriko kultur taldeen parte hartzea bideratzeko.
- Euskararen erabilerarako ordenantzak egitea.
- Auditoria egitea lortu.
- Hasitako proiektuetan sakontzea: aurrekontu parte hartzaileak, genero berdintasun plana, Herritarrekiko komunikazioa hobetzea
- Gure ordezkaritza eta dagozkigun eskubide guztiak errespetaraztea, espainiar lege arrotzen arabera legalak izan zein ez.
- Hurrengo hauteskundeak irabaztea.
