Euskal Herriaren naziotasuna eta autodeterminazioa aldarrikatzeko Donostian egon ez ziren alderdi abertzaleek ez dute auzolanerako aitzakiarik.
Elkarlanerako deia
Juanjo Agirrezabala EAko legebiltzarkideak eta Marian Beitialarrangoitia Hernaniko alkateak irakurri zuten ezker abertzaleak, EAk eta Alternatibak adostutako testua. Herritarrek erabakitzeko eskubidea praktikan jartzeko «grina» dutela azaldu zuten, eta Espainiako Estatuaren jarrera salatu zuten grin horri «era antidemokratiko eta inposatzailean herri borondatea mespretxatzen duen arsenal politiko eta juridikoarekin» erantzutea egotziz. Eredu autonomikoa «tranpa» dela salatu zuten, «gure burujabetza espainiar batasun banaezinean asimilatzeko tranpa».
Auzitegi Konstituzionalaren erabakiaren atzeko «bataila politikoa» erabakitze eskubidea dela uste dute hiru alderdiek. Horregatik «nazioa garela» aldarrikatzeko batu ziren atzo. Gizartea agertoki politiko berri baterako martxan ari dela azpimarratu ostean, «aliantzak josteko, konfiantza ezak gainditzeko, norabide berean ibiltzeko» deia egin zien eragile politiko, sozial eta sindikal guztiei. Norberaren izaera eta erritmoak errespetatuz, baina norabide berean. «Gehiengo hori irudikatzen hastea nahi baldin badugu, guztiok beharrezkoak garela izan behar dugu argi; inor ez dago soberan»
