EZKERABERTZALEA.INFO

Hauteskundeok, Euskal Herrian aurrerapen handiak ematen ari garen garaian kokaturik datoz, non Ezker Abertzaleak –indar abertzale eta soberanista ezberdinekin batera – behin betiko konponbidea lortzeko eszenatokiaren ateak zabaltzea lortu duen, herri honetako gehiengo sozialaren atxikimenduarekin. ETAk bere jarduera armatua amaitzeko hartu duen erabakia urrats historikoa izan da norabide honetan.

Garai politiko berri honetan beraz, ezkerreko mugimendu independentista Amaiur koalizioaren eskutik aurkeztuko da azaroaren 20ko zitara, herri honetan eman diren aldaketa hauen guztien lekukoa jasoz, aurretik bilduko indarrei beste batzuk gehituz, eta bokazio argi batekin: gure herria murgildurik dagoen aldaketan beste jauzi handi bat ematea.

Erabat jakitun gara Madrilen aurkituko dugun errealitateaz: bere eredu Konstituzional eta Estatutarioaren krisi itzulezinean murgildutako Estatu bat, egoera ekonomikoarengatik larriagotua, Espainiaren ongizate ekonomiko eta politikoa kinka larrian jartzeraino. Honekin guztiarekin batera, Euskal Herriari nazio gisa izateko eta erabakitzeko dagozkion eskubideak ukatzen jarraitzen duen Estatu bat aurkituko dugu Madrilen.Ondotxo dakigu.
Estatu espainiarrak pairatzen duen egoera honetan, bi eszenatoki aurreikusten ditu Ezker Abertzaleak: inboluzio klabean burutu daitekeen bigarren trantsizioa, batetik; edo guk eskatzen duguna: frankismoaren ondorengo erreformaren hipotekak gaindituko dituen bideari hasiera emango diona, Estatuaren nazio anitzeko izaera eta autodeterminazio eskubidea onartuz berau osatzen duten herriei, tartean Euskal Herriari.

Bidegurutze honetan Amaiur koalizioak egundoko garrantzia hartzen du, izan ere azaroaren 20an ezkerreko independentismoa Hego Euskal Herrian indar bozkatuena gerta daitekeelako.

Aukera handia dugu, beraz, eskuen artean, anbizio osoz aurre egin behar dioguna.

Badakigu ez dela bide erraza izango, bai egungo gobernua bai ondorengoak ziurrenik blokeoarekin jarraitzeko hautua egingo dutelako. Denbora irabazi behar dute, gatazkaren ondorioei dagozkien aterabideak ahalik eta gehien luzatu denboran, behin estadio hori gaindituta beldur izugarria diotelako aurre egin beharko dioten Euskal Herriaren marko juridiko eta politikoaren inguruko eztabaidari. Ez dute nahi, ez dute borondaterik.

Soilik autodeterminazioaren aldeko herriaren indarretik mugitu ahal izango dugu Estatua behin betiko konponbideen eszenatokirantz. Soilik herri honi dagozkion eskubide politiko eta sozialen defentsan borrokatuz, bai hemen bai Madrilen, irekiko ditugu konponbidearen ateak. Hauxe da hauteskunde hauetan jokoan dagoena eta Amaiurrek ordezkatzen duena.

Amaiur da hauteskunde hauetan alderdi interesen gainetik herri gisa pentsatu eta jokatzen duen indar politiko bakarra, bakearekin eta normalizazio politikoarekin irmoki konprometituta dagoena, proiektu politiko guztiak egingarri izan daitezen – independentziarena barne- borrokatzen duena, preso guztiak etxeratzea bultzatuko duena, eta ETAren ziklo armatuaren amaiera eta gero, biolentzia adierazpen oro desager dadin eta eskubide guztiak errespetatuak izan daitezen lan egingo duena.

Amaiur da, gainera, PP, UPN, PSOE eta PNV alderdien ekonomia alorreko eskaintza pozoitsuari, indar hauek baitira krisiaren ondorioz eskubide sozial eta laboralak agortzen eta herri hau hondamendi ekonomikora eramaten ari direnak, aurre egingo dion indarra.

Egoera honetan, Euskal Herriak erabakitzeko eskubidea beharrezkoa du bere politika sozial eta ekonomikoa osatu eta krisi ekonomikoari erantzun ahal izateko, eta zeregin honetan Amaiur bitarteko efikaz eta beharrezkoa izango da.

Amaiurrek, gainera, egungo eszenatoki honetan aurrera egin eta sakontzeko klabearekin asmatu du: konponbide demokratikoaren eta independentziaren alde jarduteko prest dauden indar eta sektore politiko ezberdinen metaketa eta zubia da.

Ez dira guztiak, ordea, erantzun positiboak izan indarrak batu eta herri gisa jokatzeko egindako eskaintzaren aurrean; PNV alderdiaz ari gara, ezetz esan baitio eskaintza honi, eta gainera, Ezker Abertzalea erasotzeari lehentasuna eman diolako kanpaina honetan. Bietan erratu egin da.
Nolanahi ere, Ezker Abertzaleak ez dio probokazioen amuari helduko, ezta bere jarrera aldatuko ere: etorkizunean, elkarrekin lan egiteko proposamena bideratzea espero dugu, beti ere herri gisa pairatzen dugun eskubide urraketari aurre egiteko eta espainiar Estatuaren boikot jarrerari erantzuteko, nahiz eta jakin badakigun horretarako alderdi jeltzaleak bere bidea definitu behar duela: abertzaleen eskutik eta dagozkigun eskubideen defentsan arituko den; ala gatazka ukatzen jarraitzen dutenekin, herri honen aitortza eta erabakitzeko eskubidea ukatzen dutenekin itunak sinatzen jarraituko duen, urte hauetan guztietan Madrilen egin duen legez.

Erabakitzeko eskubidearen alde elkarrekin aritzeari ezezkoa eman dion PNVri, Euskal Herriaren behar nagusienen aurrean alderdikeriari lehentasuna ematen dion PNVri, gure herriaren behar nagusienen aurrean ados gaudenon batasunarekin erantzun behar diogu. Maxima baten baitan: “batasunak indartsuago egingo gaitu”. Eta Euskal Herriak autodeterminazioaren aldeko indar nagusia behar du eta hori, azaroaren 20an, Amaiurrek ordezkatu behar du.

Ondorioz, hauxe da Ezker Abertzaleak herri honetako abertzale eta demokrata orori eskatzen dien botoa: Amaiur, Amaiurri botoa emanez Euskal Herria baita garaile ateratzen dena.

Bukatzeko, Ezker Abertzaleak deia luzatu nahi du, datorren larunbatean Donostiako Belodromoan Amaiurrek egingo duen ekitaldian parte hartzera; ziur gaude hauxe izanen dela kanpaina honetako ekimen jendetsu eta indartsuena, eta bertan ikusi ahal izango dela azaroaren 20an hautestontziak beteko dituen olatua.

EZKERABERTZALEA.INFO