esan larrabetzu

EBBko Lehendakari Inigo Urkulluk azken egunotan egindako adierazpenen inguruko Ezker Abertzalearen iritzia Ezker Abertzaleak harriduraz eta larritasunez baloratzen du aurreko asteazkenean espainiar Gobernuko Presidente José Luis Rodríguez Zapatero eta Presidenteorde eta Barne Ministro den Alfredo Pérez Rubalcabarekin izandako afari-bilkuraren ostean Euskal Herriko egoera politikoaren inguruan EAJren EBBko Lehendakari den Iñigo Urkulluren adierazpenek hartu duten norabide eta profila. Bilera horretatik aurrera eman diren jokaera zein posizionamenduek Iñigo Urkulluk PSOEk egun duen posizioa bere egin duela pentsarazten digu, Ezker Abertzalearen eskutik gure herrian ireki den testuinguru berria zein aukera politikoaren garapena geldiarazteko helburu argiarekin.

Azken egunotan jazotakoaren ostean, Euskal Herrian irekitzen ari den fase politiko berriaren aurrean PNVk duen diskurtso eta jarreraren definizioan bilkura hori inflexio une izan dela dirudi.

Azken egunotan Iñigo Urkulluk hainbat hedabideei eginiko adierazpenak EBBko lehendakari batenak baino Espainiar Gobernuko ordezkari baten adierazpenak dirudite; ETA eta Ezker Abertzalearen inguruko bertsio polizialei sinesgarritasuna emanez, Ezker Abertzaleari “listoiak” ezartzen eta bitartean eskubide urraketa masiboa gauzatzen duen PSOEren gobernuaren politika polizial eta judizialari babesa emanez eta era berean Alderdien Legeari eta Ezker Abertzalearen legeztapenaren inguruan Gobernuak darabilen joko instrumentalari abala emanez.

Bitxia da Urkulluk Ezker Abertzaleari “listoiak” ezartzen dizkion hein berean Bruselako Adierazpena eta Gernikako Akordioa gutxiestea, bitartean PPren gatibu den PSOEren Gobernuaren posizioaren inguruko hausnarketarik egiten ez duenean. Larritasun berezia ematen dio jokaera horri PSOEk egun garatzen duen politikaren helburua Euskal Herrian gatazka eta eskubide urraketa iraunaraztea izateak, politika horren adibiderik gordinenak operazio politiko-polizialetan atxiloturiko militante politiko abertzaleen tortura testigantza iraunkorrak direlarik. Badirudi bere alderdiko sektore batzuk kaleraturiko “Batu gaitezen”-a bere erara interpretatu duela Urkulluk, ideia hori gatazkaren konponbidearen ildoan PSOE eta PPrekin batuz garatu duelarik.

Agertoki politiko berri bat eraikitzeko alde guztiei konpromisoak eskatzearen rola bere gain hartu beharrean, jendartean irekiriko itxaropenei positiboki erantzuten ez dien PSOEren “ordezkari” bilakatu da Iñigo Urkullu.

Horregatik, burukide jeltzalearen “aldaketa” eta diskurtsoak pentsarazten digu Iñigo Urkulluk baketzeari ekarpen gisa saltzen duen “egonkortasun” instituzionalerako itunaren atzean dauden akordioen artean badaudela PNVren interes zehatzekin lotura dutenez gain (zerrenda bozkatuenari errespetua, inbertsio ekonomiko konkretuak…) Barne Ministeritzatik Rubalcabak mantentzen duen posizioarekiko lerrokatze eta leialtasunarengatik ordaina jasotzen dituztenak ere.

PSEren eskutik PNVek euskal agertokian izan duen birkokapen estrategikoarekin eta bi alderdiek euskal jendartearen sektore garrantzitsuak ilusionatu dituen esparru independentista-subiranistaren hedatzea ahultzeko duten interesarekin izango lukete lotura akordio zein jasoriko ordainsariak.

Gatazka politikoa bake bidean eta aterabide demokratikoen ildoan kokatzeko fase politiko berri bat eraikitzeko euskal jendartearekiko ditugun konpromiso guztien eta Gernikako Akordioak jasoriko alde-askotariko eskaeren berrespenetik, Ezker Abertzaleak ardura kolektiborako deia egiten dio PNVren zuzendaritzari eta bereziki bere oinarri sozialari, jendartearen osotasunaren interesak kalkulu politiko-elektolarei eta botere instituzional kotei lehenestea eskatuz.

Desiragarria litzateke PNVk espiritu eta konpromiso hori bere egitea.

Ezker Abertzalea
2010eko azaroak 6

http://www.ezkerabertzalea.info/